बिज्ञापन

बिज्ञापन

सार्वजनिक गरिएको आर्थिक सर्वेक्षणमा नगरको आर्थिक तथा सामाजिक अवस्थाको समग्र चित्र प्रस्तुत गरिएको छ। यसले आगामी योजना तथा बजेट निर्माणका लागि आवश्यक तथ्यगत आधार उपलब्ध गराउनुका साथै आर्थिक वर्ष २०८२/०८३ मा सम्पन्न भएका प्रमुख विकास आयोजना, सेवा प्रवाह सुधारका प्रयास, सामाजिक तथा आर्थिक विकास, पूर्वाधार विस्तार, शिक्षा, स्वास्थ्य, वातावरण संरक्षण, सुशासन र संस्थागत विकाससँग सम्बन्धित उपलब्धिहरू समेटेको छ।

कार्यक्रमलाई सम्बोधन गर्दै नगर प्रमुख मिठाराम अधिकारीले स्थानीय सरकारको प्रभावकारिता समयमै योजना निर्माण, पारदर्शी वित्तीय व्यवस्थापन र नागरिकप्रतिको उत्तरदायित्वमा निर्भर रहने बताउनुभयो। उहाँले वार्षिक नगर विकास योजना, नीति तथा कार्यक्रम, आर्थिक सर्वेक्षण तथा वार्षिक प्रकाशन समयमै सार्वजनिक हुनु नगरपालिकाको सुशासन, पारदर्शिता र उत्तरदायी शासनप्रतिको प्रतिबद्धताको प्रमाण भएको उल्लेख गर्नुभयो।

उहाँले अब विकासका निर्णय अनुमानका आधारमा नभई तथ्य र प्रमाणका आधारमा गरिने स्पष्ट पार्दै यस उपलब्धिको श्रेय सम्पूर्ण जनप्रतिनिधि, कर्मचारी, विकास साझेदार, सञ्चारमाध्यम, नागरिक समाज तथा नगरवासीलाई जाने बताउनुभयो। आगामी दिनमा नागरिकको अपेक्षाअनुसार गुणस्तरीय, प्रविधिमैत्री र परिणाममुखी सेवा प्रवाहलाई अझ प्रभावकारी बनाइने उहाँको भनाइ थियो।

नगर उपप्रमुख अनिता लामाले स्थानीय सरकारको सफलताको आधार नागरिक सहभागिता, समावेशी योजना र वित्तीय अनुशासन भएको बताउनुभयो। योजना निर्माणदेखि कार्यान्वयनसम्म महिला, युवा, ज्येष्ठ नागरिक, अपाङ्गता भएका व्यक्ति तथा सबै समुदायको सहभागिता सुनिश्चित गर्दै अघि बढिरहेको उल्लेख गर्दै उहाँले सार्वजनिक गरिएका दस्तावेजहरूले नगरको विकास यात्रालाई थप व्यवस्थित, उत्तरदायी र प्रभावकारी बनाउने विश्वास व्यक्त गर्नुभयो। यस कार्यमा सहयोग पुर्‍याउने सम्पूर्ण सरोकारवालाप्रति उहाँले आभार व्यक्त गर्नुभयो।

प्रमुख प्रशासकीय अधिकृत अजय बर्तौलाले समयमै दस्तावेज तयारी हुनु संस्थागत समन्वय, परिणाममुखी कार्यसंस्कृति र जिम्मेवारीबोधको उत्कृष्ट उदाहरण भएको बताउनुभयो। जनप्रतिनिधि, विषयगत महाशाखा, शाखा, वडा कार्यालय तथा सम्पूर्ण कर्मचारीबीचको प्रभावकारी समन्वय र निरन्तर मेहनतका कारण निर्धारित समयमै दस्तावेज तयार गरी सार्वजनिक गर्न सम्भव भएको उहाँको भनाइ थियो। आगामी दिनमा डिजिटल सुशासन, तथ्यमा आधारित निर्णय प्रणाली, वित्तीय पारदर्शिता तथा प्रभावकारी सार्वजनिक सेवा प्रवाहलाई अझ संस्थागत गर्दै लगिने उहाँले बताउनुभयो।

नगरपालिकाले यस उपलब्धिमा प्रत्यक्ष तथा अप्रत्यक्ष रूपमा योगदान पुर्‍याउने जनप्रतिनिधि, कर्मचारी, विषयगत महाशाखा तथा शाखा, वडा कार्यालय, सञ्चारकर्मी, विकास साझेदार, नागरिक समाज, सुरक्षा निकाय तथा सम्पूर्ण नगरवासीप्रति धन्यवाद तथा आभार व्यक्त गरेको छ।

नगरपालिकाका अनुसार समयमै सार्वजनिक गरिएका यी दस्तावेजहरूले विकास योजना कार्यान्वयन, बजेट व्यवस्थापन, सार्वजनिक उत्तरदायित्व, वित्तीय अनुशासन, संस्थागत सुशासन तथा नागरिकमैत्री सेवा प्रवाहलाई थप प्रभावकारी बनाउनेछन्। साथै बुढानीलकण्ठलाई सुशासित, समृद्ध, स्मार्ट र नागरिकमैत्री नगरपालिकाका रूपमा विकास गर्ने अभियानलाई आगामी वर्षहरूमा पनि निरन्तरता दिइने प्रतिबद्धता व्यक्त गरिएको छ।